Hector Brunoe remsloop CăăsOo na tp lleanaAaCie 9Aae ă
Hector Bruno (Valletta, 6 ta' Lulju, 1959) huwa attur, magħruf l-iktar għal irwoli komiċi. Għamel seba' snin Sindku tal-Belt Valletta.
Studja l-Liċeo u beda jirreċta mal-Antoninani tal-Belt.
Werrej
- 1 Politika
- 2 Teatru
- 3 Passatempi
- 4 Ħajja Personali
Politika[immodifika | immodifika s-sors]
Fl-1975, beda jaħdem ta' ġurnalist ma' In-Nazzjon Tagħna, fejn sar Assistent editur u dam sal-1992. Darba, kien ġie msawwat fil-Parlament u għamel xahrejn l-isptar l-Ingilterra.
Kien Viċi President tal-MZPN u membru fl-Eżekuttiv tal-Partit Nazzjonalista.
Fl-1992, Hector Bruno sar l-ewwel sindku tal-Belt, fejn dam sal-1999.
Fis-snin tmenin huwa sar PRO tal-Ministeru tal-Ambjent u iktar tard tal-Edukazzjoni. Kien Segretarju tal-Kumitat Festi Nazzjonali. Kien President tal-Għaqda tal-Pawlini (1991-1995). Kien editur tar-rivista Il-Kapitali.
Teatru[immodifika | immodifika s-sors]
Fis-snin tmenin kien popolari fl-ispettakli mtella' mill-Partit Nazzjonalista, l-iktar l-imitazzjoni impekkabbli tiegħu tal-Prim Ministru Karmenu Mifsud Bonnici.
Ħa sehem f'diversi produzzjonijiet teatrali. Magħruf l-iktar għall-pantomimi fejn kien ikollu l-parti ewlenija tad-Dama.
Ippreżenta diversi programmi televiżivi u radjufoniċi.
Passatempi[immodifika | immodifika s-sors]
Dilettant tal-mudelli tal-knejjes.
Ħajja Personali[immodifika | immodifika s-sors]
Wara nuqqas ta’ diversi snin mix-xena televiżiva u l-palk, fl-2016, Hector Bruno tkellem dwar dak li għadda minnu huwa u jikkombatti d-dipressjoni għall-aħħar sitt snin u anki tumur li tfaċċalu tliet snin qabel. Fil-programm Xarabank, Hector Bruno qal li fl-aħħar snin seħħet tibdila sħiħa fih minħabba l-kundizzjonijiet li ħakmuh, fosthom dipressjoni akuta li reġgħet ħarġitlu għat-tieni darba fl-2010.
Bruno kien spiċċa jibki l-ħin kollu u minkejja li pprova jagħmel sforz biex ikompli jferraħ lin-nies bil-komiċità tiegħu, wasal f’perjodu fejn ma felaħx aktar u qal lanqas kien kapaċi jħares lejh innifsu fil-mera aħseb u ara jidher quddiem in-nies. Tkellem ukoll dwar mumenti li fihom anki kkonsidra li jtemm ħajtu. Qal li kienu l-familja u l-konsegwenzi li seta’ ħalla warajh kieku temm kollox, li żammewh milli jagħmel suwiċidju. Minflok Hector għażel li jiġġieled u wara li fittex l-għajnuna psikjatrika rnexxielu jegħlibha u kiseb lura l-abbiltà li jagħmel mill-aħjar li jista’ biex meta titfaċċa problema jiġġildilha u tgħaddi.
Il-komiku li tul is-snin tant faqa’ nies bid-daħk, tkellem ukoll dwar tumur li tfaċċalu tliet snin qabel li wkoll qal ħalla l-effetti tiegħu fuq ħajtu. Huwa qal li t-tumur mhuwiex wieħed aggressiv u li qed jieħu kura għalih kull xahar, li qal qed tkun effettiva. Bruno wera x-xewqa li jerġa’ jirritorna fix-xena għax iħoss li għad fadallu x’joffri lill-pubbliku li minkejja kollox dejjem baqa’ jappoġġjah.